“Ferrari” toparyndan ýaryşa gatnaşyjy Karlos Saýns-kiçi 2025-möwsüminden başlap “Williams Racing” toparyna geçýär. Bu barada “Formula-1-iň” britaniýaly toparynyň metbugat gullugy habar berýär.
2024-möwsüminiň ahyrynda 29 ýaşly ispaniýalynyň “Ferrari” bilen şertnamasy tamamlanar. Toparda onuň ornuny ýedi gezek dünýä çempiony Lýuis Hemilton eýelär.
Saýns “Formula-1” ýaryşlarynda üç ýeňiş gazandy we 23 gezek münbere çykdy.
Häzirki möwsümde ol 162 utuk gazanyp, umumy sanawda bäşinji orny eýeleýär. Saýns 2021-nji ýylda “Ferrarä” gelmezden ozal “Toro Rosso”, “Renault” we “McLaren” toparlarynda çykyş etdi.
