Amerikaly boksçy, ýarym agyr agram derejesinde absolýut dünýä çempiony Roý Jons-kiçi russiýaly repçi Jigan bilen söweşer. Bu barada “Çempionat” portaly habar berýär.
Görkezme boks söweşi 6-njy iýulda “Lužniki” sport meýdançasynda Moskwa sportunyň gününiň çäklerinde geçiriler.
Jigan kikboksing boýunça Ýewropa çempionatynyň kümüş baýragynyň eýesidir. Ol “Moskwa sporty” portaly bilen söhbetdeşlikde garşydaşynyň derejesine garamazdan, öz güýjüne ynanýandygyny aýtdy.
“Tutluşyk aňsat bolmaz, her näme diýsegem, maňa garşy absolýut çempion çykyş edýär. Ýöne men biderek elimi türgenleşdirmedim we ýedi ýaşymdan boks bilen biderek meşgullanmadym, soňky aý bolsa özümi doly taýýarlyga bagyşladym: sagatlap konsolda faýting oýnadym” – diýip, meşhur ýerine ýetiriji degişýär.
Ol ýeňiş gazanmak mümkinçiliginiň erbet däldigini, “sebäbi Roýuň eýýäm öz ýokary derejesinde däldigini” belledi.
