Braziliýaly söweşiji Aleks Pereýra UFC 303 ýaryşynyň esasy söweşinde Irži Prohazkadan möhletinden ir üstün çykyp, ýarym agyr agramda UFC-niň çempiony titulyny gorady. Söweş Paradaýzda (Newada ştaty, ABŞ) geçirildi.
36 ýaşly Pereýra ikinji raundyň başynda garşydaşyny nokauta gidirip, ikinji gezek titulyny gorady. Ol birinji goragyny şu ýylyň aprel aýynda amerikaly Jamal Hille garşy geçiripdi, ony birinji raundda nokaut ýagdaýyna düşürdi.
Bu braziliýalynyň Prohazka bilen ikinji söweşi boldy. Öň, Pereýra orta agramda UFC-niň çempionydy. Ýarym agyr agram derejesinde titulyny 2023-nji ýylyň noýabr aýynda Prohazkany ikinji raundda nokauta gidirip gazandy.
Pereýranyň hasabynda garyşyk başa-baş söweşlerde 11 ýeňiş we iki ýeňliş bar. 31 ýaşly Prohazkanyň hasabynda indi 30 ýeňiş, bäş ýeňliş we bir deňme-deňlik bar.
Belläp geçsek, ilkibaşda UFC 303 ýaryşynyň esasy söweşi Konor Makgregor bilen Maýkl Çendleriň arasyndaky tutluşyk bolmalydy, ýöne bu söweş irlandiýalynyň şikes almagy sebäpli ýatyryldy.
