2025-nji ýylda Abu-Dabide şeýh Zaýediň milli muzeýi açylar. Bu geljekki desganyň esasy aýratynlygy - bäş sany ganatly heýkeltaraşlyk eseriniñ diňe bir binany bezemek bilen çäklenmän, eýsem tebigy howa çalşygyny hem üpjün edýändigidir diýip, New Atlas ýazýar.
Foster + Partners kompaniýasy tarapyndan işlenip düzülen bu taslama Emirlikleriň düýbüni tutujy şeýh Zaýediň laçyn awlamaklyga we ýurduň daglyk ýerlerine bolan söýgüsinden ylham aldy. Ganatlar 83 metrden 123 metre çenli beýiklige galyp, gyzgyn howany özüne çekmek bilen, tüsseçykar ýaly hereket edýär.
“Howa galareýalar boýunça, dil tüsseçykardan çykýan ýaly, ýokary galýar. Ganat şekilli diňleriň ýokarsynda yssy howany çykaryjy wentilyasiýa deşikleri açylýar. Arassa howa aşakda tutulyp, ýere gömlen sowadyjy turbalara çekilýär, soňra bolsa muzeýiň westibýulyna girýär " – diýip, kompaniýanyň işgärleri düşündirdiler.
Muzeýiň içinde gytaklaýyn tebigy yşyk bilen yşyklandyrylan giň atrium bar. Iň ýokarky gatda dört sany kapsula görnüşli galereýa bar, olaryň her biri ganatlaryň biriniň esasyny emele getirýär.
Muzeýiň sergisi BAE-nyň gadymy artefaktlaryndan başlap, häzirki zaman medeniýetine çenli taryhyny öz içine alar. Peýzaž bagynda myhmanlar Şeýh Zaýediň terjimehalynyň möhüm pursatlary bilen tanşyp bilerler.
Şeýh Zaýed milli muzeýi Luwr Abu-Dabi we Berkli Abu Dabi konserwatoriýasy ýaly ýerleri öz içine alýan adybir adadaky Saadiýat sebiti üçin giň gerimli ösüş taslamasynyň bir bölegidir.
