Gözlegçiler Ikinji jahan urşunyň iň meşhur gämilerinden biri bolan Amerikanyň USS Harder suwasty gämisiniň soňky çöküp galan ýerini tapdylar. Batyrlygy we yzgytsyz hüjümleri bilen tanalýan bu suwasty gämi 1944-nji ýyldan bäri Günorta-Hytaý deňziniň düýbünde ýatypdyr diýip, Business Insider habar berýär.
ABŞ-nyň Harby-deňiz taryhy we mirasy müdirligi (NHHC) Ikinji jahan urşy döwründe ýitirilen 52 amerikan suwasty gämisini tapmaga bagyşlanan Lost 52 taslamasy tarapyndan toplanan maglumatlary ulanyp, tapyndyny tassyklady.
Ady rowaýata öwrülen kapitan Semýuel Diliniň ýolbaşçylygyndaky Harder alty söweş syýahatyny amala aşyrypdyr we bir gezekki patrulçylygynda üç sany ýapon esminini gark etmek bilen meşhurlyk gazanypdyr.
900 metrden gowrak çuňlukdan tapylan suwasty gäminiň, söweş çapygyny hasap etmeseň, ýagdaýynyň degişlilikde gowudygy bellendi.
NHHC: "Suwasty gämileri, gurluşy bilen bagly, tanamak kyn. Ýöne heläkçiligiň bolan ýeriniň we Lost 52 tarapyndan alnan maglumatlaryň örän oňat saklanandygy sebäpli NHHC-e munuň hut Harder-digini tassyklamak başartdy" – diýip habar berýär.
Ösen fotogrammetriýa we suwasty robot tehnikalary Lost 52 toparyna gark bolan suwasty gäminiň jikme-jik şekillerini döretmäge mümkinçilik berdi.
Suwasty partlamalaryň pidasy bolan Harder 1944-nji ýylda Filippinleriň kenarynda ýapon goşunlary tarapyndan gark edilipdir. Onuň üstünde ekipažyň 79 agzasy bar eken.
