Türkmenistandan ýaş türgen Ogulşat Amanowa Perunyň paýtagty Limada geçirilýän agyr atletika boýunça ýetginjekleriň dünýä çempionatynyň (IWF World Youth Championships 2024) kümüş medalyna mynasyp boldy. Bu barada Halkara agyr atletika federasiýasynyň saýtynda habar berilýär.
22 – 26-njy maýda geçirilýän ýaryş dünýäniň 50 ýurdundan 280-e golaý türgeni ýygnady.
Amanowa geçen ýyl 13 ýaşynda 45 kg çenli agram derejesinde altyn medala mynasyp boldy. Bu gezek ol 49 kg çenli derejede çykyş edip, ýene gowy netije görkezdi. Onuň itekläp götermekde bir synanyşygy ýerine ýetirip bilmändigine garamazdan, ol ýaryşyň birinji ýarymyndan soň öňdebaryjy bolup, ony iki ýaryşyň jemi boýunça 77-91-168 netije bilen ikinji orunda tamamlady. Ol geçen ýylky umumy görkezijisini 12 kg ýokarlandyrdy.
Şol bir wagtyň özünde Aşgabadyň 104-nji orta mekdebiniň okuwçysy silterläp götermekde (77 kg) “altyn” we itekläp götermekde (91 kg) “bürünç” aldy.
Kakasy tarapyndan türgenleşdirilýän Ogulşat soňky synanyşykda öňdeligi eýeledi, ýöne 17 ýaşly ispaniýaly Lusiýa Gonsales 93 kg götermegi başaryp, iki ýaryşyň jemi boýunça 76-93-169 netije bilen birinji orny eýeledi.
Bürünç medaly 74-89-163 netije bilen Fransiýadan Margo Koçetowa aldy.
Belläp geçsek, ýaryşa 13-17 ýaşyndaky türgenler gatnaşýar. Lusiýa Gonsales üçin bu ýetginjekleriň arasynda çykyşynyň soňky ýylydyr.
Ýene bir türkmen agyr atletikaçysy Didarbek Jumabaýew 67 kg çenli agram derejesinde ýaryşy münberden bir ädim yzda tamamlady. Ol iki ýaryşyň jemi boýunça 372 kg netije (177+155) bilen dördünji orny eýeledi. Itekläp götermekde “Olimp” orta sport mekdebiniň okuwçysy üçünji orny eýeledi.
