Angliýanyň “Çelsi” futbol kluby toparyň baş tälimçisi Maurisio Poçettino bilen şertnamany ýatyrdy. Çözgüt ikitaraplaýyn ylalaşygyň esasynda kabul edildi diýip, futbol klubunyň metbugat gullugy habar berýär.
“Çelsiniň” eýelerine bu klubuň taryhynyň bir bölegi bolmak mümkinçiligi üçin minnetdar. Indi toparyň geljek ýyllarda Angliýanyň çempionatynda we Ýewropa ýaryşlarynda öňe gitmek üçin gowy mümkinçilikleri bar” – diýip, argentinaly türgen belledi.
KHBS Poçettinonyň “Mançester Ýunaýtede” ýolbaşçy bolup biljekdigini habar berýär.
Žurnalist Dewid Ornşteýniň maglumatlaryna görä, “MÝ” eýýäm öňden bäri Poçettinony göz öňünde tutýar we indi, ähtimal, 52 ýaşly tälimçini çagyrmak meselesine çynlakaý sereder. Toparyň häzirki halypasy – niderlandiýaly Erik ten Hagyň geljegi näbelli bolup galýar.
Ýatlap geçsek, Maurisio Poçettino “Çelsiniň” baş tälimçisi wezipesine 2023-nji ýylyň maý aýynda bellendi. Bu döwürde onuň ýolbaşçylygynda topar ähli ýaryşlarda 51 oýna gatnaşyp, 27 ýeňiş gazandy, 10 gezek deňme-deň oýnady we 14 gezek ýeňlişe sezewar boldy.
Angliýanyň premýer-ligasynyň häzirki möwsüminiň jemi boýunça “Çelsi” 63 utuk bilen altynjy orny eýeläp, 2024/25-möwsüminde Konferensiýalar ligasyna gatnaşmagyny üpjün etdi. Şeýle-de, londonlylar Angliýa ligasynyň Kubogynyň finalyna çykyp, “Liwerpuldan” goşmaça wagtdan soň 0:1 hasabynda utuldylar.
