Hytaý taryhda ilkinji gezek Aýyň arka tarapyndan toprak nusgalaryny ýygnamak üçin “Çane-6” awtomatik kosmos stansiýasyny üstünlikli uçurdy. Uçuş Hytaýyň Merkezi telewideniýesi tarapyndan ýaýlyma berildi diýip, TASS habar berýär.
Stansiýa Haýnan adasyndaky Wençan kosmodromyndan “Çançžen-5 Y8” raketa göterijisiniň kömegi bilen uçuryldy. “Çane-6” orbital, gonuş, uçuş we yzyna gaýtaryş modullaryndan ybarat. Halkara hyzmatdaşlygyň çäklerinde gonuş modulynyň bortunda Fransiýadan, Italiýadan we Ýewropanyň kosmos agentliginden ylmy gurallar, orbital modulyň bortunda bolsa Pakistandan kiçiräk hemra bar.
Aýyň arka tarapynda gonuş ýeri hökmünde Günorta polýus – Eýtken basseýninde ýerleşen Apollon krateri saýlandy.
“Çane-6” Aýa asuda gonar. Enjam burawlaýjy gurluşlaryň we robotlaşdyrylan kowşuň kömegi bilen Aý topragyndan nusgalary ýygnar. Nusgalar konteýnere ýerleşdirilenden soň, uçuş moduly Aýy terk edip, Aý orbitasyndaky orbital enjam bilen biriger. Soňra yzyna gaýtaryş moduly nusgalary Ýere getirer we Hytaýyň demirgazygynda, Içerki Mongoliýa awtonom sebitinde gonar. Missiýanyň 53 gün dowam etmegine garaşylýar.
Ýatlap geçsek, 2020-nji ýylyň 24-nji noýabrynda Haýnan adasyndaky Wençan kosmodromyndan “Çançžen-5” raketa göterijisi uçuryldy. Ol Aýa “Çane-5” enjamyny iberdi. Bu stansiýa HHR-iň hünärmenleri tarapyndan hem ylmy maksatlar, hem ylmy-gözleg bazasynyň gurluşygyna taýýarlyk boýunça taslama üçin öwrener ýaly 2 kg töweregi Aý topragyny ýygnap, uçuşdan, takmynan, 23 gün soň Ýere gaýdyp geldi.
