Amerikanyň Exodus Propulsion Technologies başlangyjy reaktiwsiz kosmos hereketlendirijisiniň işlenip taýýarlanandygyny yglan etdi diýip, “Haýtek» ýazýar.
Başlangyjy esaslandyryjy we NASA-nyň öňki inženeri Çarlz Býuler The Debrief bilen bolan söhbetdeşliginde öz toparynyň ýangyç ulanman, dartyş güýjüni ýeňip geçmek üçin ýeterlik güýç döredip biljek enjamy döredip bilendigini aýtdy.
Täze hereketlendiriji elektrostatik basyşyň assimetriýa ýörelgesine esaslanýar. Kompaniýanyň inženerleri zarýady saklap we zerur güýç öndürip biljek ýörite materiallary taýýarladylar.
Býuler olaryň döreden hereketlendirijisiniň massa zyňyndysyz, Ýeriň dartyş güýjüne deň güýji görkezýändigini öňe sürýär. Onuň pikirine görä, bu açyş kosmos syýahatynda has uzak aralyga we arzan missiýalara mümkinçilik berýän täze döwri alamatlandyrýar.
Býuleriň we onuň toparynyň bu taslamanyň üstünde ýigrimi ýyldan gowrak wagt işländigi bellenilýär.
Beýleki başlangyçlar öňem şuňa meňzeş üstünlikleri yglan edipdiler, ýöne olaryň ösüşi ylmy jemgyýetçiligiň synagyndan geçip bilmändi, şonuň üçin bu täzeligiň hem seresaplylyk bilen barlanylmagy talap edilýär. Şeýle-de bolsa, Býuleriň tejribesi we gazanan üstünlikleri: NASA-nyň Halkara kosmos stansiýasy we “Habbl” teleskopy ýaly programmalarynda işländigi taslama ynam döredýär.
