27-nji aprelde Prezident Serdar Berdimuhamedow Türkmen bedewiniň milli baýramy mynasybetli Arkadag şäherinde gurlan döwrebap ýaşaýyş jaýlaryndan täze jaýlaryň açarlaryny sowgat hökmünde gowşurdy.
Arkadag şäherinde Aba Annaýew adyndaky Halkara atçylyk akademiýasynda Türkmen bedewiniň milli baýramy mynasybetli geçirilen dabaralaryň çäklerinde Prezident Serdar Berdimuhamedow Halkara atçylyk akademiýasynyň professor-mugallymlaryna, Atçylyk ylmy-önümçilik merkeziniň alymlaryna hem-de Arkadag şäheriniň atşynaslaryna täze şäherde gurlan döwrebap ýaşaýyş jaýlaryndan 120 maşgala niýetlenen täze jaýlaryň açarlaryny sowgat hökmünde gowşurdy.
Serdar Berdimuhamedow “Täze jaýlar gutly bolsun! Ýurt garşy alsyn!” diýen sözler bilen atşynaslary mübärekledi.
Halkara ahalteke atçylyk assosiasiýasynyň wise-prezidenti B.Rejebow täze jaýlaryň açarlaryny hoşallyk bilen kabul edip, Arkadag şäheriniň ähli atşynaslarynyň, Halkara atçylyk akademiýasynyň we Atçylyk ylmy-önümçilik merkeziniň işgärleriniň, alymlarynyň adyndan Türkmenistanyň Prezidentine hoşallyk bildirdi.
