San-Paulu uniwersitetiniň kompýuter tehnologiýalary boýunça braziliýaly alymlary ýolda ýabany haýwanlary ýüze çykarmak we olar bilen baglanyşykly ulag heläkçilikleriniň sanyny azaltmak üçin emeli aň guralyny döretdiler. Gözleg «Scientific Reposts» (SciRep) ylmy žurnalynda çap edildi.
Braziliýa dünýäde iň baý biologiki dürlülige eýedir, ýöne bu artykmaçlygyň zyýanly tarapy hem bar – ýurtda her sekuntda 16 töweregi ýabany haýwan ulaglaryň pidasy bolýar we awtoulaglar bilen urlan oňurgaly haýwanlaryň sany her ýyl 475 milliona golaýlaýar.
Gözlegçiler awtoulaglar tarapyndan yzygiderli urulýan haýwanlaryň bäş görnüşiniň müňlerçe suraty bolan maglumatlar binýadyny döretdiler: pumalar, äpet garynja iýýän haýwanlar, tapirler, möjekler we ýabany pişigiň bir görnüşi bolan ýaguarundiler.
Hünärmenler emeli aňa hödürlenen haýwanlary hakyky wagtda tanamagy öwretdiler. Soňra onuň netijeliligini subut etmek üçin ulgamy synagdan geçirdiler.
Topar döreden neýroulgamyny Braziliýanyň ýol gözegçilik ulgamlaryna ornaşdyrmak üçin tehnologiýa kompaniýalarynyň goldawyny almagy umyt edýär. Bu edilip bilinse, emeli aň nawigasiýa programmasyna habarnamalar iberip, sürüjilere ýolda ýabany haýwanyň peýda bolandygy barada duýduryş berip biler.
Bu gural adamlary puma we beýleki iri ýyrtyjy haýwanlara duşmakdan gorap biler.
