Ýaponiýada iň uly awtoöndüriji kompaniýa bolan Toyota Motor 2023-nji maliýe ýylynda (2023-nji ýylyň aprel aýy – 2024-nji ýylyň mart aýy) dünýädäki zawodlarynda 9,97 milliondan gowrak awtoulag çykardy, bu hem kompaniýanyň taryhynda rekord boldy. Bu barada kompaniýanyň resmi hasabatyna salgylanyp, TASS habar berýär.
Maglumatlara görä, önümçilik göwrümi geçen ýylyň görkezijileri bilen deňeşdirilende 9,2% ýokarlandy. Şeýle-de bolsa, korporasiýa meýilleşdirilen 10,1 mln awtomobil maksadyna ýetip bilmedi. Bu, aýratynam, maglumatlaryň galplaşdyrylmagy we üpjün edijileriň zawodlaryndaky, şeýle-de Toyota Motor toparyna girýän firmalaryň birindäki dawalar sebäpli ýüze çykan meseleler bilen baglanyşykly boldy.
Kompaniýa 2023-nji maliýe ýylynda dünýäde 10,3 milliondan gowrak awtomobil satdy, bu hem korporasiýanyň taryhynda rekord boldy. Önüm satuwynyň möçberi geçen ýyl bilen deňeşdirilende 7,3% ýokarlandy. Bu ABŞ-da, ÝB ýurtlarynda we Ýaponiýanyň özünde islegiň durnukly bolmagy bilen baglanyşyklydyr. Şol bir wagtyň özünde, satuw möçberi iň uly awtomobil bazarlarynyň biri bolan Hytaýda azaldy.
Hasabatda bellenilişi ýaly, häzirki wagtda dünýäde gibrid benzin-elektrik awtoulaglaryna uly isleg bildirilýär.
