Wise-premýer H.Geldimyradow «Türkmenistanyň Ilaty durmuş taýdan goramak hakynda kodeksine üýtgetme girizmek hakynda» Türkmenistanyň Kanunynyň taslamasy boýunça Mejlis bilen degişli işleri geçirer. Bu barada Prezident Serdar Berdimuhamedow 25-nji aprelde geçirilen Hökümet mejlisinde degişli tabşyryk berdi.
Mejlisiň barşynda wise-premýer H.Geldimyradow Türkmenistanyň Prezidentiniň tabşyrygy boýunça dürli pudaklara sanly ulgamyň ornaşdyrylmagyny çaltlandyrmak, degişli kadalaşdyryjy-hukuk esaslaryny berkitmek boýunça görülýän çäreler barada hasabat berdi.
Hasabatyň çäklerinde Zähmet we ilaty durmuş taýdan goramak ministrliginiň ýanyndaky Pensiýa gaznasynyň işini kämilleşdirmek, raýatlara hödürlenilýän ugurdaş sanly hyzmatlaryň görnüşlerini giňeltmek maksady bilen geçirilýän işler barada aýdyldy.
Serdar Berdimuhamedow hasabaty diňläp, ýurdumyzyň Pensiýa gaznasynyň işini yzygiderli kämilleşdirmegi dowam etmegiň, bu işde sanly hyzmatlaryň gerimini giňeltmäge, onuň mümkinçiliginden doly peýdalanmaga möhüm ähmiýet bermegiň wajypdygyny belledi.
