Demirgazyk dag sugunlarynyň (karibu) sanynyň azalmagynyň öňüni almak boýunça çäreleri öwrenýän kanadaly gözlegçiler möjekleri atmagyň populýasiýany dikeltmegiň iň netijeli usulydygy baradaky netijä geldiler.
Alymlar “Ecological Applications” žurnalynda neşir edilen makalada möjekleri özüne çekýän loslaryň sanyny azaltmak ýaly beýleki usullaryň o diýen netijeli däldigini belleýärler.
Kanadada soňky 30 ýylda karibunyň populýasiýasy tas 50% azaldy, sebitiň subpopulýasiýasynyň üçden bir bölegi bolsa gyryldy. Alymlar munuň sebäbi hökmünde sugunlary gaçybatalgadan we iýmitden mahrum eden tokaýlaryň çapylmagyny hem-de möjekleriň ýyrtyjylygyny belleýärler.
Soňky ýyllarda hökümetler we ýerli halklar populýasiýanyň azalmagyny saklamaga synanyşyk etdiler, ýöne bu çäreler gerekli netijäni bermedi.
Indi alymlar düýpli çäräni – möjekleriň bir bölegini atmagy teklip edýärler. Olaryň pikiriçe, bu karibuny gyrylmakdan halas etjek ýeke-täk çäredir.
“Guardian” bilen söhbetdeşlikde dokladyň awtorlarynyň biri, alym Kleýton Lemb möjekleri atmasaň, karibunyň ýitiriljekdigini we beýleki bir görnüşi halas etmek üçin möjekleri atmagyň hem diýseň kyn çözgütdigini aýtdy.
Ýeri gelende 2020-nji we 2021-nji ýyllarda Alberta welaýatynda eýýäm 824 möjegiň, 2015-nji ýyldan bäri Britan Kolumbiýasynda bolsa 1944 möjegiň öldürilendigini bellemek gerek.
