Merkezi Ýewropada we Balkanlarda adaty bolmadyk yssy ýazdan, käbir sebitlerde temperaturanyň 30°C-e çenli gyzmagyndan soň, garaşylmadyk ýagdaýda gar ýagdy. Gar Awstriýa, Horwatiýa, Rumyniýa, Bosniýa we Gersegowina düşdi diýip, Euronews habar berýär.
Rumyniýada iki gün dowam eden yssydan soň, şu hepde temperatura 20°C-a çenli peseldi. Şeýlelik bilen, ýurduň demirgazyk-günbataryndaky Kluž-Napoka şäherinde termometriň sütünjigi 25°C-den 4°C-e çenli aşaklady.
Awstriýada, Karintiýadaky Paksattel geçelgesini hem öz içine almak bilen, daglyk ýerlerde gar ýagdy. Doňaklyk sebäpli birnäçe ýol heläkçiligi hadysalary boldy we köp ýollarda typmakdan goraýan zynjyrlar gerek boldy. Halas edijiler agaçlaryň garyň agramyna çydaman ýykylmagyndan gorkýarlar.
Horwatiýada ýurduň käbir ýerlerinde gar gatyşykly ýagyş ýagdy. Ýaşaýjylar güllän miweli agaçlara sowuk urmagyndan ätiýaç edýärler.
Gar Bosniýa we Gersegowinanyň daglyk ýerlerini, şeýle hem ýurduň paýtagty Saraýewony örtdi. Ondan öň sebitdäki howanyň temperaturasy 30°C-a ýetipdi, bu Balkanlar üçin ýylyň bu wagty adaty däl howadyr.
Klimatologlar howanyň temperaturasynyň birden peselmegini howanyň üýtgemegi bilen baglanyşdyrýarlar.
Ondan öň Bütindünýä Meteorologiýa Guramasy 2023-nji ýylyň taryhyň iň yssy ýyly bolandygyny, 2024-nji ýylyň ondanam has yssy ýyl bolup biljekdigini mälim etdi.
