Nissan kompaniýasy ýakyn wagtda Ýewropanyň we käbir beýleki sebitleriň bazarlarynda peýda boljak Qashqai krossoweriniň täzelenen görnüşini hödürledi diýip, auto.ru habar berýär.
Modeliň daşky görnüşi düýpli üýtgedildi: täze bamper, başga hili radiator gözenegi we kämilleşdirilen yşyklandyryş tehnologiýasy. Sintetiki materiallar ulanylyp, bezegi üýtgedilen görnüşleri, giňeldilen reňk gammalary we teker diskalarynyň görnüşlerine saýlaw bar.
Salonyň içindäki esasy täzelik - Google operasiýa ulgamyna esaslanýan media ulgamy. Işleýşi öňküden has gowy, gurlan programmalary (kartalar, ses kömekçisi, Google Play) we kameralaryň töwerekleýin düşürmek mümkinçilikleri (şol sanda “dury kapot” režimi) bar.
Ýewropa bazary üçin hereketlendirijiniň diapazony öňküligine galýar: Qashqai diňe 140-dan 190 at güýji bolan gibrid görnüşlerde hödürlenýär.
Täzelenen Nissan Qashqai üçin sargytlary kabul etmek işi 2024-nji ýylyň tomsunda açylar.
