17-nji aprelde Indoneziýada Demirgazyk Sulawesi welaýatynyň Tagulandang adasynda ýerleşýän Ruang wulkanynyň güýçli atylmasy bolup geçdi diýip, ýerli metbugata salgylanýan The New York Times ýazýar.
Ýerli wagt bilen sagat 19:19-da başlanan atylma howa giňişligine 300 metr beýiklikdäki kül sütünini zyňdy. Häkimiýetler golaý obalaryň 800-den gowrak ýaşaýjysyny gyssagly göçürdiler. Göçürilenler üçin sebitde täze wagtlaýyn ýaşaýyş merkezleri açylýar.
Ruang wulkany - bu köp ýyllaryň dowamynda lawa, kül we wulkan işjeňliginiň beýleki önümlerinden emele gelen stratowolkandyr. Ruangyň soňky uly atylmasy 2002-nji ýylda bolupdy.
Indoneziýa "Otly halka" diýlip atlandyrylýan zolakda - Ýuwaş ummanynyň astyndaky tektoniki plitalaryň çaknyşýan ýerinde ýerleşýär. Bu sebitde ýertitremeleri we wulkan atylmalary ýygy-ýygydan bolýar.
