Ýaponiýanyň ululygy boýunça üçünji adasy bolan Kýusýuda suw joşmalaryna we süýşgünlere getiren güýçli ýagyşlar sebäpli ýerli häkimiýetler köpçülikleýin ewakuasiýa yglan etdiler. Bu barada The Japan Times habar berýär.
Kumamoto prefekturasynda birnäçe sagadyň dowamynda 37 mm möçberinde ygal düşdi. Netijede, onlarça öýi suw basdy, awtoulaglar ýollardan akyp gitdi, toprak ýollar bolsa ýumruldy. Birnäçe adamyň dereksiz ýitendigi habar berilýär, ýogalanlar barada maglumat ýok.
Ýerli häkimiýetleriň berýän maglumatyna görä, ewakuasiýa işleri ilaty, takmynan, 3 million adamdan ybarat sebitleri öz içine alýar. Iň howply zolakda 380 müňden gowrak adam ýaşaýar. Halas edijiler suw basan öýlerden özbaşdak çykyp bilmedik birnäçe garry ýaşaýjylary çykardylar.
Häzirki howa şertleri sebitiň demir ýol gatnawyna hem päsgelçilik döredýär. Kyushu Railway Co. ýokary tizlikli otlularyň hereketini ýagdaý gowulaşýança togtatdy.
