Marokkoda 2030-njy ýyldaky dünýä çempionaty üçin gurulmagy meýilleşdirilýän täze stadionyň taslamasy tanyşdyryldy.
«The Sun» gazetiniň habaryna görä, stadion «Grand Stad de Kasablanka» diýlip atlandyrylar. Stadion 115 müň tomaşaçyny kabul eder, bu bolsa dünýäniň beýleki stadionlaryndan has köpdür. Stadion Al-Mansuriýa şäherinde gurlar.
Bu stadionyň gurulmagy bilen marokkalylar Ispaniýa we Portugaliýa bilen bilelikde geçiriljek 2030-njy ýyldaky Dünýä çempionatynyň finalyny geçirmek hukugyna eýe bolmak isleýärler. Ispaniýa hem finaly Madridde ýa-da Barselonada geçirmegi umyt edýär.
Futbol boýunça dünýä çempionatynyň ilkinji gezek üç yklymda we alty ýurtda geçiriljekdigini ýatladýarys. 2030-njy ýyldaky dünýä çempionatynda oýunlaryň aglabasy Marokkoda, Ispaniýada we Portugaliýada oýnalar. Üç oýun Günorta Amerikada bolar. Açylyş oýny Urugwaýda oýnalar, onda ýerli milli ýygyndy oýnar. Bu Argentinanyň we Paragwaýyň milli ýygyndylarynyň toparçalardaky ilkinji oýunlaryna-da degişlidir – olar açylyş oýunlaryny öz ýurtlarynda geçirerler.
