Italiýanyň Lamborghini kompaniýasy 20 ýyldan gowrak wagtyň içinde ilkinji gezek “gazaba münen öküzli” logotipini üýtgetdi. Bu barada öndürijiniň saýtynda habar berilýär.
Täze nyşan öküziň şekilini saklap galdy, ýöne indi ol birneme sada we reňk taýdan çäklendirilen boldy. Umuman, logotip özüniň beýleki aýratynlyklaryny-da: geraldika galkanyny we öküziň ýokarsynda markanyň adyny saklap galdy. Ýöne şol bir wagtyň özünde şekil has “tekiz” boldy, sebäbi dizaýnerler relýeflerden ýüz öwürmek kararyna geldiler.
Täze Lamborghini logotipiniň esasy reňkleri gara we ak boldy, adaty sary we altynsow reňkler bolsa diňe goşmaça öwüşgin berijiler hökmünde ulanylar. Reňkleriň ählisi has öçügsi edildi. Täze logotipiň Huracan-yň mirasdüşeri boljak superkarda ilkinji gezek peýda bolmagyna garaşylýar. Lamborghini ony bir ýyla golaý wagt bäri synagdan geçirýär. Şeýle-de, nyşan Urus krossoweriniň täzelenen wersiýasyna we häzirki Revuelto flagmanyna-da goýulmaly.
