Angliýanyň Futbol Assosiasiýasy (FA) we Angliýanyň premýer-ligasy (APL) «Ineos» himiýa ägirdiniň eýesi britaniýaly milliarder Jim Retkliffiň «Mançester Ýunaýted» klubynyň 25 göterim paýnamalaryny satyn almagyny makulladylar. Bu barada «Sky Sports» Gymmatly kagyzlar we birža komissiýasynyň (SEC) maglumatlaryna salgylanyp habar berýär.
Ozal Retkliffiň «Trawlers Limited» kompaniýasynyň «B» derejeli paýnamalaryň 25 göterimini satyn alandygy we «A» derejeli paýnamalaryň 25 göterimine çenli satyn almak barada ylalaşandygy habar berildi. Bu geleşigiň bahasy 1,2 milliard funt sterling (1,52 milliard dollar) boldy. Mundan başga-da, telekeçi «Old Trafford» stadionynyň infrastrukturasyna 300 million dollar maýa goýar, şolardan 200 million dollar şertnama baglaşylandan soň tölener we 2024-nji ýylyň ahyryna çenli ýene 100 million dollar geçiriler.
Ondan öň «Mançester Ýunaýtediň» paýnamalarynyň ýeke-täk eýeleri kluby 2005-nji ýylda 1,34 milliard dollara satyn alan Awram we Joel Gleýzerlerdi. Şondan bäri «gyzyl şeýtanlar» Angliýanyň premýer-ligasynda bäş gezek ýeňiji boldy, dört gezek Angliýanyň ligasynyň Kubogyna we 6 gezek Angliýanyň Superkubogyna eýe boldy, Çempionlar ligasynda ýeňiji boldy we ýaryşyň finalynda ýene iki gezek oýnady. «Mançester Ýunaýtediň» janköýerleri soňky birnäçe ýyl bäri Gleýzerler maşgalasyna garşy çykyş edýärler.
