«Formula-1» awtoulag ýaryşy boýunça dünýä çempionatynyň başlamagyna ýarym aý galdy we toparlar täze ýaryş ulaglaryny tanyşdyryp başladylar. Bu gezek tanyşdyryş dabarasyny «Ferrari» we «Aston Martin» toparlary geçirdi.
«Ferrari» geň galdyrmady: adaty gyzyl reňk, korpusa käbir üýtgeşmeler girizilipdir, ýöne hünärmenleri esasy gyzyklandyrýan zat daşky görkezijiler däl-de, hereketlendiriji we gurluş (podweska) bilen baglanyşyklydyr, çünki geçen ýyl «Ferrari» toparynyň sürüjileri, köplenç, şolar zerarly kösenýärdiler.
Ýöne muny diňe synag sürüşinde we ilkinji ýaryşlarda görmek bolar, şonuň üçin «SF-24» indeksini alan täze «Ferrari» awtoulagyna baha bermekde hünärmenler howlukmaýarlar.
«Aston Martin» toparynyň 2024-nji ýyl üçin niýetlenen ýaryş ulagy öňküsinden pes däl.
Toparyň ulaglary geçen ýylky keşbini tutuşlygyna diýen ýaly saklady. Diňe käbir hemaýatkärlik ýazgylary we gaty ownuk aýratynlyklar üýtgedi. «Aston Martin» ulagynyň agramyny azaltmak üçin iň döwrebap usullary örän oýlanyşykly we ýerlikli ulanmagy dowam etdirýär.
