Dohada geçirilen suw sporty boýunça dünýä çempionatyna adaty bolmadyk türgen gatnaşdy.
Eýranly Tagi Askari tomaşaçylaryň el çarpyşmalary astynda beýiklikde howuza bökdi. Bu türgen ýaňy-ýakynda ýüz ýaşyny belläpdi. Elbetde, munuň üçin oňa utuk berilmedi – bu synanyşyk ýaryşdan daşary ýerine ýetirildi. Şeýle-de bolsa, Taginiň sporta ukyplylygy we edermenligi hormat goýulmaga mynasypdyr.
Askari 1951-nji ýylda Delide geçirilen halkara ýaryşlarynda ilkinji gezek çykyş etdi. Hindistanda geçirilen ilkinji Aziýa oýunlarynda üç metrlik tramplinde bürünç medal, 10 metrlik beýiklikde bolsa kümüş medal gazandy.
Sport weteranynyň bellemegine görä, suwa çümmek onuň ýaşlygyndan bäri iň halaýan güýmenjesi bolupdyr. Bu sport arkaly ol pul gazanyp, maşgalasyna kömek etmäge, şeýle hem dünýäni görmäge mümkinçilik aldy. Tagi Askari Eýranyň çempionatynda ýene bir gezek altyn medal gazanyp, sport karýerasyny 41 ýaşynda tamamlady.
Ol Doha şäherinde geçirilen suw sporty boýunça dünýä çempionatyna hormatly myhman hökmünde çagyryldy. Emma ol bu derejä kän bir göwnemedi we aýdylyşy, ýaly könäni ýatlamak kararyna geldi.
Şowhunly el çarpyşmalary astynda Tagi Askari bir metr belentlikden suwa bökdi.
Çykyşyndan soň, suw sporty boýunça dünýä çempionatynyň iň garry gatnaşyjysy ýaryşyň hakyky altyn medaly bilen sylaglandy.
