Lenovo muşdaklaryny we bäsdeşlerini geň galdyrmagyny dowam etdirýär. Kompaniýa Barselonadaky MWC 2024 sergisinde görkeziljek dury ekranly we gapakly noutbugyň üstünde işleýär. Windows Report-yň habar berşi ýaly, bu dünýäde şeýle dizaýnly ilkinji noutbuk bolar.
Noutbuk biznes ulanyjylara gönükdirilen ThinkBook hataryna degişli bolar. Onuň ekranynyň diagonaly 15 ýa-da 16 dýuým bolup, klawiaturada sanly blok bar. Noutbukda Windows 11 operasion sistemasynyň gurnalmagy mümkin, kompaniýa prosessor hökmünde bolsa Intel-iň soňky platformalarynyň birini ulanar.
Noutbugyň iň esasy aýratynlygy durulygydyr. Noutbugyň ekrany we gapagy şöhlelendirmäge mümkinçilik berýän ýörite materialdan taýýarlanar. Ýygnalan ýagdaýda gapakdan klawiatura görnüp durar, açylan ýagdaýynda ekranda wirtual obýektler şöhlelener.
Kompaniýanyň wekilleriniň aýtmagyna görä, bu üsti ýetirilen hakykat effektini döreder we noutbuk bilen özara täsiri gowulaşdyrar.
Noutbugyň esasy komponentleri gapagyň dury bolmadyk aşaky böleginde ýerleşer. Şeýle-de, ekran we klawiatura çarçuwalary dury bolmaz. Ýöne klawiaturanyň fiziki ýa-da sensor boljakdygy heniz düşnüksiz. Ähtimal, Lenovo iki görnüşi hem hödürlär. Öndüriji dury noutbugyň çykjak senesini we bahasyny mälim etmeýär, ýöne onuň gymmat boljakdygyna garaşyp bolar.
Öň, biz Realme-niň içi görünýän korpusly smartfony hödürländigini habar beripdik.
