Belgiýanyň milli ýygyndysynyň we Angliýanyň «Mançester Ýunaýted» klubunyň öňki futbolçysy Maruan Fellaýni sport karýerasyny tamamlaýandygyny habar berdi.
Ýarymgoragçynyň soňky kluby Hytaýyň «Şandun Taýşan» topary boldy. Ol toparyň düzüminde 2019-njy ýyldan bäri çykyş edip gelýärdi.
«Bu ajaýyp syýahat boldy! Iň gowy görýän sportum bilen iň ýokary derejede meşgullanandygyma örän begenýärin. Belgiýada «Standard», Angliýada «Ewerton» we «Mançester Ýunaýted», şeýle hem Hytaýda «Şandun Taýşan» toparlaryna wekilçilik edendigime buýsanýaryn. 2008-nji ýylda geçirilen Olimpiýa oýunlarynda, Ýewro-2016-da, 2014-nji we 2018-nji ýyllardaky dünýä çempionatlarynda Belgiýanyň milli ýygyndysynyň düzüminde oýnamak meniň üçin uly hormat boldy» diýip, Fellaýni «Instagramda» ýazdy.
«Standardyň» düzüminde Fellaýni Belgiýanyň çempiony boldy we ýurduň Superkubogyna eýe boldy. «Mançester Ýunaýted» bilen bilelikde Angliýanyň Kubogyny, Liganyň kubogyny, ýurduň Superkubogyny aldy we Ýewropa ligasynda ýeňiji boldy. Belgiýanyň milli ýygyndysynyň futbolçysy hökmünde Fellaýni 87 oýna gatnaşyp, 18 pökgi geçirdi. Ol 2018-nji ýylda Russiýada geçirilen dünýä çempionatynda bürünç medala mynasyp boldy.
