9-njy ýanwarda “Napoleon” filmi sanly platformalara çykdy. Baş keşbi Hoakin Feniksiň ýerine ýetirmegindäki filmi Amazon Prime-da görmek bolar, ýakyn wagtda ol Apple TV+ serwisiniň katalogynda hem peýda bolar. Bu barada championat.com habar berýär.
“Napoleon” beýik fransuz serkerdesi Napoleon Bonapartyň durmuşy barada gürrüň berýär. Filmiň wakalarynyň köp bölegi onuň häkimiýet başyna gelmegine hem-de imperator aýal Žozefina (Wanessa Kirbi) bilen gatnaşyklaryna bagyşlanýar. Kartinany “Gladiatoryň” we köp sanly beýleki kult filmleriniň režissýory Ridli Skott ýola goýdy.
Kartinanyň premýerasy dünýäniň kinoteatrlarynda 22-nji noýabrda boldy. Bir ýarym aýyň içinde film prokatda 213 mln dollar töweregi girdeji ýygnady, ýöne uly girdejili hit filme öwrülmedi. Şeýle-de bolsa, ol heniz sanly ulgamda we fiziki göterijilerde çykdajylaryň öwezini dolup biler.
