Türkmenistanyň Döwlet medeni merkeziniň Döwlet muzeýi alymlardan näbelli gadymy organizmiň yzlaryny saklaýan dag jynsynyň nusgasyny aldy. Ol ýaşy 60 – 80 mln ýyl bolan ýokarky hek döwrüniň deňiz çökündileriniň arasyndan tapyldy diýip, “Neýtralnyý Türkmenistan” gazeti habar berýär.
Bu daşa öwrülen görnüş Sünt-Hasardag gerşiniň etegindäki Günbatar Köpetdagda, Magtymguly şäheriniň töwereklerinde tapyldy. Gadymy organizmiň yzlary 8-12 mm diametrli altyburçluklardan ybarat torjagaza meňzemek bilen, ary öýjüklerini ýada salýar. Olar 130-150 sm2 meýdany eýeleýär.
“Tertipli altyburçly gurluş obýektiň biologiki gelip çykyşy barada pikirlendirýär. Häzirki düşünjelere görä, şeýle yzlary gubkalar, suwotulary we çuňlukda ýaşaýan uly protistler ýaly ýönekeý organizmleriň galdyran bolmagy mümkin” – diýlip, makalada Russiýanyň Ylymlar akademiýasynyň Paleontologiýa muzeýiniň ylmy işgäri, biologiýa ylymlarynyň kandidaty Dmitriý Grigorýewiň sözleri getirilýär.
Alym häzirki günde şeýle tapyndylaryň ýüzlerçesiniň mälimdigini aýtdy. Gözlegçileriň pikiriçe, bu yzlar ylma heniz mälim bolmadyk jandara degişli bolup biler.
