Hytaýyň Mediakorporasiýasy geçip barýan ýylda ýurtda we dünýäde bolup geçen esasy sport wakalarynyň reýtingini hödürledi. Sanawyň ikisinde-de birinji orny Hançžouda geçirilen 19-njy Halkara Aziýa oýunlary eýeledi. Bu barada bigasia.ru belleýär.
Şeýle-de, global sport wakalarynyň arasynda Germaniýanyň milli ýygyndysynyň basketbol boýunça dünýä çempionatynda we Ispaniýanyň zenanlar ýygyndysynyň dünýäniň futbol birinjiliginde taryhy ýeňşi bellendi. Halkara Olimpiýa Komiteti kibersport boýunça komissiýanyň döredilendigini yglan etdi, Lionel Messi sekizinji gezek “Altyn top” baýragyna eýe boldy, serbiýaly tennisçi Nowak Jokowiç bolsa Uly tuwulga ýaryşlarynda titullarynyň sany boýunça rekord goýdy.
Soňra keniýaly ýeňil atletikaçy Kelwin Kiptumyň Çikago marafonyndaky rekordy, 2028-nji ýylyň tomusky Olimpiýa oýunlarynyň maksatnamasyna girjek sportuň bäş görnüşi we fransiýaly suwda ýüzüji Leon Marşanyň dünýä rekordy gelýär. Global onlugy dünýä çempionatynda indiwidual köp görnüşli ýaryşda altynjy gezek ýeňiş gazanan amerikaly Simona Baýls jemleýär.
Hytaýyň esasy sport wakalarynyň arasynda 19-njy Aziýa we 31-nji Bütindünýä tomusky talyplar oýny, Hytaýyň basketbol boýunça zenanlar ýygyndysynyň Aziýanyň Kubogynda we ýurduň badminton boýunça ýygyndysynyň Sudirmanyň Kubogynda ýeňşi, şeýle-de Hytaýyň Fukuokada geçirilen sportuň suw görnüşleri boýunça dünýä çempionatynda absolýut liderligi we beýlekiler bar.
