IDC analitik kompaniýasynyň statistikasy Hytaýyň Transsion smartfon öndürijisiniň üçünji çärýegiň jemi boýunça dünýä bazarynyň 8,6%-ini eýelemegi başarandygyny we 8,9% bilen dördünji orny eýeleýän Oppo kompaniýasyndan birneme yza galandygyny görkezýär. Şol bir wagtyň özünde, bu kompaniýanyň smartfon üpjünçiligi 35% ýokarlandy we umuman, işiň ösüş dinamikasy onuň bu reýtingde dördünji orny eýelemegine bil baglamaga mümkinçilik berýär diýip, 3dnews.ru belleýär.
Ýylyň başyndan sentýabr aýyna çenli Transsion-yň girdejisi ýyllyk deňeşdirmesinde 20% ýokarlanyp, 5,8 mlrd dollara ýetdi, arassa girdeji bolsa 70% ýokarlandy. Kompaniýa smartfon bazarynda ýaş oýunçy, ol häzirki at bilen 2013-nji ýyldan bäri hereket edýär. Kompaniýanyň iş strategiýasy Afrikanyň, Ýakyn Gündogaryň we Günorta Aziýanyň bazarlaryna gönükdirilýär. Geçen çärýek Transsion smartfon üpjünçiliginiň göwrümini geçen ýylyň degişli döwri bilen deňeşdireniňde 35%, ýagny 26 mln birlige çenli artdyrdy.
Geçen ýyl Transsion özüniň Tecno, Itel we Infinix söwda markalarynyň kömegi bilen Afrikanyň smartfon bazarynyň 40%-ini eýeledi. Ol Pakistanda we Bangladeşde hem öňdebaryjy orunlary eýeleýär. Kompaniýanyň Efiopiýada, Hindistanda we Bangladeşde smartfon öndüriji kärhanalary bar. Ol belli bir ýurtlarda we sebitlerde programma üpjünçiligini müşderileriň zerurlyklaryna görä uýgunlaşdyrmak ugrundaky tagallalary bilen hem üstünlik gazanýar. Mysal üçin, ol has garaýagyz bedenli ulanyjylar üçin ýüz tanamak ulgamynyň has gowy işlemegini gazandy. Fewral aýynda çeýe displeýli ilkinji smartfonyny hödürledi we emeli aň tehnologiýalaryna maýa goýup başlady.
