Hytaýda «Bir guşak, bir ýol» Üçünji ýokary derejeli maslahaty (BRF) tamamlandy. Bu maslahat syýasaty öwrenijileriň we sebitdäki dürli habar beriş serişdeleriniň wekilleriniň aýtmagyna görä, soňky döwrüň möhüm wakasyna öwrüldi.
Ol diňe foruma gatnaşan ýurtlaryň gerimi bilen däl, eýsem, ony geçirmek üçin çuňňur oýlanyşykly strategiýasy bilen hem haýran galdyrdy. Döwlet Baştutanlarynyň we ýurtlaryň ýolbaşçylarynyň gatnaşan çäresiniň esasy resmi bölüminden başga-da «Bir guşak, bir ýol» maslahatynyň çäginde birnäçe duşuşyklar guraldy.
Goşmaça forumlarda hünärmenler we Pekine gelen myhmanlar Aziýa yklymynyň ýurtlarynyň ilatyny gyzyklandyrýan iň möhüm meseleleri ara alyp maslahatlaşdylar. Syýasatşynaslar, bilermenler we analitikler syýasy-diplomatik, söwda-ykdysady, medeni-ynsanperwer gatnaşyklara, howa bilen bagly we başga-da birnäçe meselelere üns berdiler.
Şol bir wagtyň özünde, bolup geçýän wakalaryň hemmesi köpçülikleýin habar beriş serişdeleriniň wekilleri, guramaçylar, esasan hem «Ženmin žibao» gazetiniň redaksiýasy tarapyndan beýan edildi. Žurnalistler üçin HHR-de bolmagyň ýörite maksatnamasy hem taýýarlanypdyr. Şeýle hem žurnalistikanyň ösüşiniň häzirki döwrüniň iň möhüm meseleleriniň biri bolan kiberhowpsuzlyk we sarp edijilere ygtybarly maglumat getirmek barada çekişme geçirildi.
Hususan-da, Hytaýyň paýtagtynda «Bir guşak, bir ýol» metbugat hyzmatdaşlygy forumy geçirildi, oňa 60-dan gowrak ýurtdan dürli habar beriş serişdeleriniň wekilleri gatnaşdy. Onda biziň ýurdumyza «Türkmenistan: Altyn asyr» elektron gazetiniň redaksiýasynyň direktory Myrat Bekmyradow wekilçilik etdi. Forumda metbugat işgärleri Hytaýyň «Bir guşak, bir ýol» başlangyjyny öňe sürmekde žurnalistleriň möhüm ornunyň bardygyny aýtdylar. Hytaýyň başlangyçlary köp babatda sebitdäki goňşularynyň meýilnamalaryna, ösüşine laýyk gelýär we olar özara baglanyşyklydyr.
Forumda kiberhowpsuzlyk we maglumat ygtybarlylygy meselelerini bilelikde çözmek üçin mümkinçilikleri ösdürmegiň we başarnyklary ýokarlandyrmagyň zerurdygyny nygtaýanlaryň sözleri has-da ýerlikli boldy. Munuň üçin özara peýdaly hyzmatdaşlyk, şol sanda «Bir guşak, bir ýol» başlangyjynyň çäginde pikir alyşmak, tejribe we tehnologiýa alyşmak has möhümdir.
Köpçülikleýin habar beriş serişdeleriniň wekilleriniň forumynda «Bir guşak we bir ýol» başlangyjy bilen baglanyşykly neşirleri, telewideniýede hem-de radio ýaýlymlarda berlen gepleşikleri bilen tapawutlanan žurnalistleri sylaglamak dabarasy geçirildi. Şeýle hem Ýewraziýanyň öňdebaryjy habar beriş serişdeleri üçin forumyň çäginde metbugat gezelenji guraldy. Gezelençde žurnalistler Pekin, Sian, şeýle hem Sindao şäherlerindäki ösen kärhanalaryň işleri we häzirki zaman jemgyýetçilik-medeni desgalary bilen tanyşdylar.
