2023-nji ýylyň ýanwar – awgust aýlarynda Azerbaýjan bilen Türkmenistanyň arasyndaky haryt dolanyşygy geçen ýylyň degişli döwri bilen deňeşdirilende tas 3 esse ýokarlanyp, 645 mln ABŞ dollaryna deň boldy. Bu barada Türkmenistanyň Garaşsyzlygynyň 32 ýyllygy mynasybetli Bakuwda, “Gülüstan” köşgünde geçirilen dabarada Azerbaýjanyň Zähmet we ilatyň sosial goragy ministri Sahil Babaýew aýtdy.
“2021-nji ýylda Hazar deňzindäki “Dostluk” ýatagynyň wodorod baýlyklaryny bilelikde gözlemek we ulanmak boýunça özara düşünişmek baradaky Ähtnama gol çekilmegi sebitiň gülläp ösüşini ýokarlandyrmak, parahatçylygy we durnuklylygy üpjün etmek, Hazarda hyzmatdaşlygy ösdürmek we energetika howpsuzlygyny güýçlendirmek nukdaýnazaryndan möhüm ähmiýete eýedir. Biz ulag we üstaşyr pudagynda-da uly öňegidişlikleri gazandyk” – diýip, Sahil Babaýew belledi.
Türkmenistanyň Azerbaýjandaky ilçisi Gurbanmämmet Elýasow ýurduň garaşsyzlyk ýyllarynda gazanan üstünlikleri barada aýtmak bilen, Azerbaýjan bilen Türkmenistanyň arasyndaky gatnaşyklaryň ýokaryň derejesine ünsi çekdi.
Çärede Azerbaýjanyň Ýaşulular geňeşiniň başlygy Eldar Guliýew we Türkmenistanyň Medeniýet ministri Atageldi Şamyradow hem çykyş etdi. Dabara diplomatik missiýalaryň ýolbaşçylary, döwlet edaralarynyň we jemgyýetçilik guramalarynyň wekilleri gatnaşdy.
