UFC-niň prezidenti Deýna Uaýt 16-njy dekabrda ABŞ-da geçiriljek UFC ýaryşynyň esasy söweşine gatnaşyjylaryň atlaryny resmi taýdan yglan etdi. Las-Wegasda geçiriljek UFC 296 ýaryşynda çempion Leon Edwards bilen amerikaly Kolbi Kowingtonyň arasynda ýarym orta kategoriýada titul ugrunda söweş bolar. Bu barada Uaýt öz sosial ulgamlarynda habar berdi diýip, championat.com belleýär.
Kowington bu titul üçin eýýäm iki gezek söweşdi, ýöne iki söweşde-de Kamaru Usmandan ýeňildi. Kowingtonyň geçenki söweşi 2022-nji ýylyň mart aýynda UFC 272-de Horhe Maswidala garşy boldy. Kolbi emin agzalarynyň biragyzdan karary bilen üstün çykdy.
Edwards 2022-nji ýylyň awgust aýynda UFC 278-de Usmany nokauta gidirip, titula eýe boldy, soňra UFC 286 ýaryşynda oňa garşy söweşde tituly goramagy başardy.
