Ýazyjy Joan Roulingiň goly bolan “Garri Potter we jadygöýüň daşy” kitabynyň seýrek neşirlerinden biri Beýik Britaniýada auksiona çykaryldy. Söwda gurnaýjylary onuň ahyrky bahasynyň 12 müň funt sterlinge ýetmegine garaşýarlar diýip, MIR24 habar berýär.
Gürrüň “Potteriananyň” ilkinji romanynyň ýazyjynyň goly bolan ýörite neşiri barada gidýär. Hansons auksion öýüniň müdiriniň kömekçisi şeýle kitaplaryň bary-ýogy 15 sanydygyny we olaryň hiç haçan satuwa çykarylmandygyny aýdýar.
Auksionda hödürlenen nusga Glazgodan 26 ýaşly Karina Hauşine degişlidir. Ol ony 2012-nji ýylda Bloomsbury neşirýat öýüniň bäsleşiginde gazanypdyr. 2023-nji ýylda Hauşiniň öýünde ýangyn bolýar, ýöne kitaba zeper ýetmeýär. Bu kitap üçin 8 – 12 müň funt sterling tölenip bilner diýip, The Telegraph ýazýar.
Neşiriň maglumatlaryna görä, auksion 5-nji sentýabrda geçiriler.
