Indoneziýanyň paýtagty Jakartanyň hapalanan howasyny arassalamak üçin ýurduň ýörite gulluklary ýagyş ýagdyrmaga synanyşdylar. Bu barada Sindo news habarlar agentligi habar berýär diýip, rossaprimavera.ru belleýär.
Indoneziýanyň Milli gözlegler we innowasiýalar agentliginiň howanyň üýtgemeginiň tehnologiýasy barlaghanasynyň ýolbaşçysynyň beýanyna görä, bu operasiýa 19-njy awgustdan 21-nji awgust aralygynda üç günüň dowamynda geçirildi.
Bu işe Milli tebigy betbagtçylyklary dolandyryş agentliginiň, Meteorologiýa, klimatologiýa we geofizika agentliginiň we Milli gözlegler we innowasiýalar agentliginiň hünärmenleri gatnaşdy. Bu amal bulutlara duz düzümli reagentleri we ýakylmadyk heki sepmek arkaly geçirildi.
Operasiýanyň netijesinde Jakartanyň eteginde ujypsyz ygaly gazanmak başartdy, ýöne, hünärmenleriň baha bermegine görä, bu paýtagtda howanyň hiliniň gowulanmagyna täsir etmedi.
Ýatlap geçsek, 5 – 7-nji sentýabrda Jakartada ASEAN sammiti geçirilmeli. Wakanyň öňüsyrasynda Jakartanyň häkimiýetleri howanyň hapalanma derejesini peseltmek boýunça berk çäreleri görýärler.
Häkimiýetler tarapyndan görülýän çäreleriň arasynda şäher administrasiýasynyň işgärleriniň 75%-iniň uzak aralykdan işe geçirilmegi we işlenip çykýan gazlaryň hapalanma derejesiniň barlagyndan geçmedik ulaglar bilen hökümet kwartalyna girmegiň gadagan edilmegi bar.
