Indoneziýanyň latimeriýasy (Latimeria menadoensis) ilkinji gezek tebigy gurşawynda surata düşürildi. Suratlar Molukk adalarynyň töwereginde düşürildi. Bu barada gözlegiň netijeleri «Scientific Reports» žurnalynda neşir edildi.
Seýrek duş gelýän balygyň suratlaryny «Unseen» ekspedisiýasynyň agzasy we suwasty operator Aleksis Şappýui düşürdi. Surata düşüriş işleri, takmynan, 145 metr çuňlukda amala aşyryldy.
Latimeriýalar häzirki wagtda ýaşaýan iň gadymy balyk görnüşleriniň biri hasaplanylýar. 1938-nji ýylda Günorta Afrikanyň kenarýakasyndan diri nusgasy tapylýança, onuň nesli ýoly ýitip gidendir öýdülýärdi. Şol wagtdan bäri, alymlara iki görnüşi mälimdir: Afrikanyň kenarlarynda ýaşaýan Latimeria chalumnae we Sulawesi bilen Günbatar Täze Gwineýanyň etekerinde ýaşaýan Latimeria menadoensis. Ikinji görnüşi henizem doly öwrenilenok, sebäbi ýaşaýan ýerlerine barmasy kyn.
Ozalky deňize çümüşlerde hünärmenler Demirgazyk Maluku welaýatynda (Indoneziýa) latimeriýalaryň bolup biljek käbir ekoulgamlaryny kesgitlediler. Bäş we sekiz minut dowam eden iki çümüşiň dowamynda, alymlar uly balygy tebigy şertlerinde synlamagy başardylar. Alymlaryň bellemegine görä, täze ýaşaýyş gurşawlarynyň öwrenilmegi olar diriligine tutulmazdan, balyklardan DNK toplumlaryny almak ýaly zyýansyz usullaryň ulanylmagyna mümkinçilik berer.
