Britaniýaly boksçy Entoni Joşuanyň indiki tutluşygyny amerikaly Deonteý Uaýlder bilen geçirmek isleýändigini onuň promouteri Eddi Hirn habar berdi.
Şenbe güni Bütindünýä boks assosiasiýasynyň (WBA Super), Bütindünýä boks guramasynyň (WBO), Halkara boks federasiýasynyň (IBF) we Halkara boks guramasynyň (IBO) agyr agram derejesinde dünýäniň öňki çempiony bolan Joşua finlandiýaly Robert Heleniusy nokauta giderdi.
«Üç söweşlik meýilnamamyz bar: Helenius, Uaýlder, soňra Taýson Fýury. Biziň maksadymyz şeýle. Onuň (Joşuanyň) Uaýlderi ýeňip biljekdigine ynanýarys. Tutluşygyň geçiriljek senesi hökmünde ýanwar aýyny göz öňünde tutýarys we biz bu sene üçin şertnama baglaşmaga taýyn. Saud Arabystany agyr agram derejesiniň taryhdaky iň iri tutluşyklaryň birini isleýär – biz muňa taýyn» diýip, Hirn «Matchroom Boxing» ýaýlymyna gürrüň berdi.
«Bu söweşi ýakynda amala aşyryp biljekdigimize begenýärin. Bu boks üçin gowy zat. Biz şol wagty ýatlap, bu ýigidiň hemmeler bilen söweşendigi hakynda pikir ederis. Biziň döwrümizde asla ýeňilmezlik möhüm däl, iň gowy derejäňde söweşmek möhüm» diýip, Joşua belledi.
