Walt Disney Co. amallary üýtgedip gurmak üçin çykarylan çykdajylar we bir gezeklik hasaplaşyklar sebäpli üçünji maliýe çärýeginde (1-nji iýulda tamamlandy) arassa ýitgini hasaba aldy diýip, Interfax.ru habar berýär. Hasabat döwründe kompaniýanyň arassa ýitgisi geçen ýylyň degişli döwründäki 1,41 mlrd dollar ýa-da paý üçin 0,77 dollar girdeji bilen deňeşdirilende, 460 mln dollar ýa-da paý üçin 0,25 dollar boldy. Bir gezeklik faktorlary hasaba almazdan, girdeji bir ýyl ozalky paý üçin 1,09 dollar bilen deňeşdirilende, paý üçin 1,03 dollar boldy. Disney-iň çärýek girdejisi 4% ýokarlanyp, 22,3 mlrd dollara ýetdi.
Disney+ striming hyzmatynyň abunaçylarynyň sany geçen çärýegiň jemi boýunça üç aý ozalky 157,8 mln abunaçy bilen deňeşdirilende, 11,7 mln birlik azalyp, 146,1 mln boldy. Disney+ hyzmatynyň abunaçylarynyň sany eýýäm üç çärýek bäri azalýar, bu Hindistanda kompaniýanyň kriket boýunça Hindistanyň premýer-ligasynyň oýunlaryny görkezmek hukugyny ýitireninden soň müşderileriň azalmagy bilen baglanyşyklydyr.
Disney-iň media- we güýmenje aktiwlerini birleşdirýän iň uly bölümçesi bir ýyl ozalky 14,1 mlrd dollara garşy 14 mlrd dollar möçberinde girdejini hasaba aldy. Analitikler bu görkezijini 14,3 mlrd dollar derejesinde çaklapdylar.
Tematiki seýilgähleri we kruiz gämilerini dolandyrýan, şeýle-de sarp ediji harytlaryny we wideo oýunlaryny çykarmak bilen meşgullanýan bölümçäniň girdejisi 13% ýokarlanyp, 8,3 mlrd dollar boldy.
