Amerikaly boksçy Terens Krouford 12 raundlyk söweşde watandaşy Errol Spensi ýeňdi. Report agentliginiň habar berşi ýaly, ABŞ-nyň Newada ştatynyň Las-Wegas şäherinde geçirilen söweş dokuzynjy raundda nokaut bilen tamamlandy.
35 ýaşly Krouford 66,68 kg çenli agram kategoriýasynda absolýut dünýä çempiony boldy. Ol Bütindünýä boks guramasynyň (WBO) titulyny gorady we öň Spense degişli bolan Bütindünýä boks geňeşiniň (WBC), Halkara boks federasiýasynyň (IBF) we Bütindünýä boks assosiasiýasynyň (WBA) titullaryny aldy. Krouford WBO-nyň guşagyny 2018-nji ýyldan bäri saklaýar, ol ony ýedinji gezek gorady.
Krouford üçin bu ýeňiş professional karýerasynda 40-ynjy boldy (31-isi nokaut bilen). Ol bir gezek hem ýeňilmedi. 33 ýaşly Spens üçin bu ýeňliş karýerasynda 28 ýeňiş bilen (22-isi nokaut bilen) ilkinji boldy. Ol 2017-nji ýyldan bäri IBF-niň, 2019-njy ýyldan bäri WBC-niň, 2022-nji ýyldan bäri WBA-nyň guşagyny saklaýardy.
Häzirki wagtda professional boksda diňe dört adam absolýut dünýä çempionlarydyr. Terens Krouforddan başga-da, bular Dewin Heýni (ABŞ, 61,23 kg çenli), Jermell Çarlo (ABŞ, 69,9 kg çenli) we Saul Alwares (Meksika, 76,2 kg çenli).
