UFC-niň prezidenti Dana Uaýt 11-nji noýabrda promouşeniň agyr agramda çempiony, 35 ýaşly Jon Jonsyň UFC 295-de 40 ýaşly watandaşy Stipe Mioçiç bilen tutluşykda titulyny gorajakdygyny habar berdi. Söweş gijesi Nýu-Ýork şäherindäki “Medison Skwer Garden” stadionynda bolar. Bu çärede UFC promouşeniň ilkinji çäresiniň 30 ýyllygyny bellejekdigi habar berdi.
Uaýt: “Bu Jon Jonsyň isleýän söweşi we muny Stipe hem isleýär. Iki ýigit üçinem miras ugrundaky söweş" - diýdi.
Jons UFC-niň wagtynda boş galan guşagyny şu ýylyň mart aýynda Siril Gan bilen söweşde gazandy. Bu onuň agyr agramdaky ilkinji çykyşydy. Jons ozal UFC-niň ýarym agyr agramda çempionydy. Umuman alanyňda, ol karýerasynda garyşyk söweş sungatynda 29 söweş geçirdi. Jons olardan 27-sinde ýeňiş gazandy, bir gezek ýeňildi we ýene bir söweş bolsa hasap däl diýip yglan edildi.
Mioçiçiň soňky sekiz söweşi agyr agram derejesinde UFC-niň titulyna eýe bolmak ugrunda geçdi. Ol ilkinji gezek guşagy 2016-njy ýylyň maý aýynda Fabrisiu Werdumy ýeňip aldy. Soňra 2018-nji ýylyň iýulynda Daniel Kormýeden utulmazyndan öň, üç gezek çempion boldy. 2019-njy ýylyň awgust aýynda Mioçiç Kormýeden ar aldy we çempionlyk adyna eýe boldy. Amerikaly pälwan 2021-nji ýylyň 27-nji martynda Frensis Ngannudan utulmazdan ozal bir üstünlikli goranyş etdi. Bu söweş häzirki wagtda Mioçiçiň karýerasyndaky iň soňky söweşdir. Umuman alanyňda, garyşyk söweş sungatynda onuň 24 söweşi bar, şolardan 20-sinde ýeňiş gazandy we dördüsinde ýeňildi.
