Milliarder Riçard Brensona degişli bolan Virgin Galactic kompaniýasynyň VSS Unity kosmoplany özüniň ilkinji täjirçilik uçuşyny üstünlikli amala aşyrdy. Bu barada BBC habar berýär.
Eve uçar göterijisi raketoplan bilen bilelikde Nýu-Meksiko amerikan ştatyndaky kosmoportdan penşenbe güni ýerli wagt bilen sagat 08:30-da uçdy we takmynan, bir sagatdan uçuşdan soň 13600 metr belentlikde raketoplan uçardan aýrylyp, öz hereketlendirijilerini işletdi we 85 km belentlige ýetip, kosmosyň serhedine çykdy.
Umuman alanyňda, tutuş uçuş bir ýarym sagat töweregi dowam etdi, bortda Virgin Galactic-iň iki uçarmanyndan we astronawt-instruktoryndan başga-da, üç italiýaly ofiser-uçarman bardy. Olar agramsyzlyk ýagdaýynda birnäçe ylmy tejribeleri geçirdiler.
Indi Riçard Brenson öňünden 250 – 450 müň dollara petek satyn alanlary kem-kemden uçuşa ibermegi meýilleşdirýär. Şeýle adamlaryň sany 800-e golaý. Olaryň käbirleri kosmosyň gyrasyna baryp görmek üçin öz nobatlaryna on ýyldanam köp wagt garaşýarlar. Munuň sebäbi Unity gämisiniň borta bary-ýogy birnäçe adamy alyp bilýändigi, uçuşlary bolsa häzirlikçe aýda bir gezek amala aşyrmagyň meýilleşdirilýändigi bilen baglanyşyklydyr.
Penşenbe güni geçirilen missiýa Galactic 01 adyny aldy. Ikinji uçuş, Galactic 02 awgust aýyna meýilleşdirilýär. Oňa öňünden petek satyn alan birnäçe ýolagçy iberiler.
