Şu gün, 12-nji iýunda Türkmenistanyň ýaşlarynyň arasynda yglan edilen ylmy işleriň bäsleşiginiň ýeňijilerini sylaglamak dabarasy geçirildi. Ylmy bäsleşik Türkmenistanyň Ylymlar akademiýasy we Magtymguly adyndaky Ýaşlar guramasynyň Merkezi geňeşi tarapyndan gurnaldy. Her ýyl geçirilýän bu bäsleşik ýurdumyzda ylmyň ösmegine, alymlaryň täze nesliniň kemala gelmegine we iň talap edilýän ugurlarda gözleg işleriniň höweslendirilmegine gönükdirilendir.
Bu ýyl bäsleşige 1362 adam gatnaşdy, şol sanda 487 okuwçy we 875 ýaş alym öz ylmy işlerini hödürledi.
Dabarada Türkmenistanyň Prezidenti Serdar Berdimuhamedowyň we Türkmenistanyň Halk Maslahatynyň Başlygy Gurbanguly Berdimuhamedowyň adyndan ylmy-gözleg hereketiniň 67 sany ýaş wekiline sowgatlar gowşuryldy.
Çäräniň dowamynda ýurduň ýokary okuw mekdepleriniň döredijilik toparlarynyň gatnaşmagynda baýramçylyk konserti guraldy.
