Monakoda geçirilen sylaglama dabarasynda EY-nyň “Dünýäniň telekeçisi 2023” halkara bäsleşiginiň ýeňijisi yglan edildi. Ol ýarym geçirijileri öndürmek üçin möhüm düzüm bölegi bolan kremniý plastinasyny çykarýan Taýwanyň GlobalWafers kompaniýasynyň baş müdiri we müdirler geňeşiniň başlygy Doris Hsýu boldy diýip, Trend habar berýär.
Monakodaky dabara “Ýylyň telekeçisi” maksatnamasynyň iň ýokary derejesi hasaplanýar. Bu özboluşly bäsleşik öz pikirleri, ruhubelentligi we üstünlikleri bilen başgalary ruhlandyrýan adamlaryň telekeçilik işiniň üstünligini ykrar etmäge mümkinçilik berýär. Şeýle görnüşli ilkinji we ýeke-täk bäsleşik hökmünde “Ýylyň telekeçisi” milli we halkara derejesinde üstünlikli, çalt depginde ösýän kompaniýalaryň esaslandyryjylarynyň we ýolbaşçylarynyň hyzmatyny ykrar etmäge gönükdirilendir.
EY kompaniýasy bu bäsleşigiň guramaçysydyr. Ýöne milli ýeňijiler hem-de “Dünýäniň telekeçisi” titulynyň eýesi garaşsyz eminler tarapyndan kesgitlenilýär.
EY-nyň “Ýylyň telekeçisi” bäsleşigi innowasion ösüşi, gülläp ösüşi goldamak bilen biziň dünýämizi özgerdýän telekeçiler üçin abraýly halkara işewürlik bäsleşigidir. “Ýylyň telekeçisi” bäsleşigi şeýle görnüşli ilkinji we ýeke-täk halkara bäsleşigidir. Dünýäniň 60-dan gowrak döwletiniň 145-den gowrak şäherinde sebitleýin we milli tapgyrlaryň ýeňijileri, adatça, Monakoda geçirilýän halkara finalda dünýäniň iň gowy telekeçisi ady ugrunda göreşmegi dowam etdirýärler.
