“Altyn topuň” eýesi fransiýaly futbolçy Karim Benzema möwsümiň ahyrynda Madridiň “Realyny” terk eder. Bu barada klubuň saýtyna salgylanyp, rsport.ria.ru habar berýär.
Benzemanyň “Real” bilen hoşlaşyk dabarasy sişenbe güni klubuň prezidenti Florentino Peresiň gatnaşmagynda geçiriler.
“Real” we kapitanymyz Karim Benzema onuň klubumyzyň oýunçysy hökmünde ajaýyp we ýatdan çykmajak döwrüni tamamlamak barada ylalaşdylar. “Real” eýýäm iň beýik legendalarymyzyň birine öwrülen adama öz minnetdarlygyny we söýgüsini bildirmek isleýär” – diýlip, habarda aýdylýar.
“Benzemanyň “Realdaky” karýerasy özüňi alyp barşyň we professionalizmiň nusgasy bolup, klubumyzyň gymmatlyklaryny görkezdi. Benzema öz geljegi barada netije çykarmak hukugyny gazandy. “Real” hemişe onuň öýi bolupdy we bolar, klub oňa hem onuň maşgalasyna durmuşynyň täze tapgyrynda ähli gowulyklary arzuw edýär” – diýlip, beýanyň üsti ýetirilýär.
Öň, HBS Saud Arabystanynyň “Al-Ittihad” klubunyň Benzema iki ýyl möhlet we jemi 200 mln ýewro bilen şertnama hödürländigini habar berdi.
Benzema “Realda” 2009-njy ýyldan bäri çykyş edýärdi. Topar bilen bilelikde ol Ispaniýanyň dört gezek çempiony, Ispaniýanyň Kubogynyň üç gezek eýesi we Super kubogynyň dört gezek ýeňijisi boldy. Şeýle-de, ol bäş gezek Çempionlar ligasynyň we Klublaýyn dünýä çempionatynyň ýeňijisi boldy. 2022-nji ýylyň oktýabr aýynda oýunçy karýerasynda ilkinji gezek “Altyn top” baýragyny aldy.
