Hokkeý boýunça dünýä çempionatynyň soňky oýnunda Kanadanyň ýygyndysy Germaniýany 5:2 hasabynda ýeňdi. Duşuşyk ýekşenbe güni Finlýandiýanyň Tamper şäherinde geçirildi.
Ýeňijileriň arasyndan şaýba geçirmekde Semýuel Bleýs (11-nji we 45-nji minut), Louson Krauz (38), Taýler Toffoli (52) we Skott Louton (59) tapawutlandylar.
Ýeňilen toparyň arasyndan bolsa Jon-Jeýson Peterka (8) we Daniel Fişbuh (34) tapawutlandy.
Öň üçünji ýer ugrundaky oýunda Latwiýanyň milli ýygyndysy ABŞ-nyň toparyny goşmaça wagtda 4:3 hasabynda ýeňipdi.
Kanadanyň topary 28-nji gezek dünýä çempionatynda ýeňiji boldy we bilelikde 27 titul gazanan SSSR-iň we Russiýanyň toparlaryndan öňe saýlanyp, bu görkeziji boýunça rekord eýesi boldy. SSSR-iň milli ýygyndysy 22 gezek, Russiýanyňky - 5 gezek dünýä çempiony boldy. Kanadaly hokkeýçiler 16 kümüş, 9 bürünç medal gazandy.
Kanadanyň topary 2019-njy ýyldan bäri Dünýä çempionatynyň finalyny sypdyrman gelýär (ýaryş koronawirus pandemiýasy sebäpli 2020-nji ýylda geçirilmedi).
