Koreýa Respublikasy iýun aýyndan başlap koronawirusyň ýaýramagy bilen baglanyşykly galan ähli çäklendirmeleri diýen ýaly, şol sanda ýokuşan halatynda hökmany izolýasiýa edilmegini ýatyrar. Bu barada penşenbe güni Yonhap gullugy ýurduň prezidenti Ýun Sok Ýola salgylanyp habar berdi diýip, TASS ýazýar.
Prezident koronawirus howpunyň kategoriýasynyň indiki aýyň başyndan "howply" derejeden "howatyrlandyryjy" derejä çenli peseljekdigini aýtdy. Yonhap-yň ýazmagyna görä, COVID-19 hakykatdanam endemik kesel diýlip yglan edildi. Hökmany ýedi günlük izolýasiýa ýatyrylar, munuň ýerine koronawirus bilen kesellän hassalara diňe bäş günlük karantin maslahat berler.
Prezident: "Näsaglar ýerleşdirilen palataly hassahanalardan başga ähli ýerlerde örtük geýmek baradaky talaby aýyrmak kararyna gelindi" - diýdi. Koreýa Respublikasy 30-njy ýanwardan başlap ýapyk binalaryň aglabasynda, 20-nji martdan başlap bolsa ulaglarda hökmany örtük geýmegi ýatyrdy, şondan soň örtük geýmek düzgüni diňe dermanhanalarda we hassahanalarda saklanyp galdy.
Günorta Koreýanyň lideri öz raýatlarynyň koronawirus ýaýranyndan bäri “üç ýyl dört aýdan geçensoň adaty durmuşa dolanyp biljekdigine” begenýändigini aýtdy.
