Hytaýyň Türkmenistandaky ilçihanasy resmi saýtynda Hytaýa wiza almak üçin ýüz tutmagyň düzgünlerini çap etdi.
Wiza üçin ýüz tutmak isleýän adamlara resminamalaryny tabşyrmazdan ozal düzgünleri ünsli okamak, wizanyň gerekli görnüşini tassyklamak, ýüz tutmak üçin zerur resminamalary taýýarlamak we olary tabşyrmak üçin kabul edilmäge ýazylmak haýyş edilýär.
Syýahatçylyk maksady bilen Hytaýa barýan syýahatçylara (L görnüşli wiza) gidiş-geliş petegi, myhmanhanadan otag bron edilendiginiň tassyknamasy, ýa-da Hytaýdaky guramalar ýa-da şahslar tarapyndan berlen çakylyk hatlary ýaly syýahat meýilnamasynyň materiallary gerek bolar.
Wiza almak üçin ýüz tutulanda şu aşakdakylary görkezmek hökmanydyr:
- Hakyky daşary ýurt biometrik pasportynyň asyl nusgasy (möhleti 6 aýdan gowrak, wiza üçin azyndan 4 boş sahypasy bolmaly), şeýle hem raýatlyk pasportynyň asyl nusgasy we pasportlaryň göçürmeleri.
- Pasportdaky ýaly, ýakynda, başaçyk düşülen, gönüden alnan, 1 sany reňkli (açyk fon) surat.
- Degişli kategoriýadaky wizany almak üçin ýüz tutmaga gerekli materiallar.
- Wiza almak üçin çap edilen we gol çekilen onlaýn-sowalnama hem-de kabul edilmäge ýazylandygyny tassyklaýan resminamanyň çap edilen görnüşi.
Talap edilýän resminamalaryň doly sanawyny Hytaýyň Türkmenistandaky ilçihanasynyň resmi saýtyndan tapyp bilersiňiz.
Hytaý Halk Respublikasynyň Aşgabatdaky ilçihanasy Arçabil şaýolunyň 45-nji jaýynda ýerleşýär.
