Italiýaly Antonio Konte Londonyň «Tottenheminiň» baş tälimçisi wezipesinden gitdi. Bu barada futbol klubunyň resmi saýtyna salgylanyp, rsport.ria.ru habar berýär.
Möwsümiň ahyryna çenli baş tälimçiniň wezipe borçlaryny Konteniň kömekçisi Kristian Stellini ýerine ýetirer.
“Baş tälimçi Antonio Konteniň ikitaraplaýyn ylalaşyk esasynda klubdan gidendigini habar berýäris. Biz oňa goşant goşandygy üçin minnetdarlyk bildirýäris we geljekde ähli gowulyklary arzuw edýäris” – diýlip, beýanda aýdylýar.
Klubuň prezidenti Daniel Lewi “Tottenhemiň” geljek möwsüm üçin Çempionlar ligasynda özüne orun gazanmalydygyny belledi.
“Biziň Angliýanyň premýer-ligasynda on oýnumyz galdy we bize Çempionlar ligasynda orun üçin göreşmek gerek. Biziň ählimiz jebisleşmeli. Her kim klubumyz we ajaýyp, wepaly janköýerlerimiz üçin ýokary netijäni gazanar ýaly elinden gelenini etmeli” – diýip, Lewi aýtdy.
Konte 53 ýaşynda. Ol 2021-nji ýylyň noýabrynda “Tottenheme” ýolbaşçy boldy. Onuň şertnamasy şu möwsümiň ahyryna çenli niýetlenipdi. Angliýanyň çempionatynyň ýaryş jedwelinde Londonyň kluby 49 utuk bilen dördünji orny eýeleýär.
