Garyşyk başa-baş söweş sungatynyň (MMA) britaniýaly söweşijisi Leon Edwards amerikaly Kamaru Usmandan üstün çykyp, ýarym orta agram kategoriýasynda UFC-niň çempion guşagyny gorady.
286-njy belgili turniriň esasy wakasy bäş raund dowam edip, emin agzalarynyň aglabasynyň çözgüdi bilen britaniýalynyň ýeňiş gazanmagynda tamamlandy.
Bu tutluşyk türgenler üçin üçünji söweş boldy: birinjisi emin agzalarynyň biragyzdan karar bermegi netijesinde Kamaru Usmanyň ýeňşi bilen tamamlandy, soňra 2022-nji ýylda Edwards titul söweşiniň gutarmagyna bir minut galanda garşydaşyny nokauta gidirip, rewanş aldy.
Ilkinji gezek guşagy goran Edwardsyň hasabynda 21 ýeňiş we üç ýeňliş bar. Usmanyň hasabynda 20 ýeňiş bilen üç ýeňliş bar.
