17-nji martda Türkmenistanyň Daşary işler ministriniň orunbasary Mähri Bäşimowa Hindistanyň Türkmenistandaky Adatdan daşary we Doly ygtyýarly Ilçisi Widhu P.Nair bilen döwletara hyzmatdaşlygyň gün tertibinde durýan wajyp meseleleri maslahatlaşdy diýip, türkmen daşary syýasat edarasynyň saýty habar berýär.
Duşuşygyň dowamynda bellenilişi ýaly, Türkmenistan bilen Hindistanyň arasyndaky gatnaşyklaryň yzygiderli ösmeginiň esasy görkezijisi iň ýokary derejedäki gepleşikler bolup durýar.
Söwda-ykdysady ulgamyndaky, ulag-logistika, maglumat-tehnologiýalary, dokmaçylyk, himiýa we nebit-gaz senagaty, binagärçilik we gurluşyk pudaklarynda hyzmatdaşlygynyň uly mümkinçilikleriniň bardygy aýdyldy.
Ylym we bilim ulgamlary, saglygy goraýyş we lukmançylyk senagaty türkmen-hindi medeni-ynsanperwer gatnaşyklarynyň ileri tutulýan ugurlary hökmünde bellenildi.
