Amerikaly Jon Jons agyr agramda Absolýut söweş çempionatynda (UFC) eýesiz duran çempionlyk adyny almak ugrundaky göreşde fransuz türgeni Siril Gany ýeňdi.
Report agentliginiň habar bermegine görä, tutluşyk ABŞ-nyň Newada ştatynyň Las-Wegas şäherinde geçirilen UFC 285 ýaryşynyň çäginde geçdi.
Söweş Jonsuň birinji tapgyrda demikdiriji usuly ulanyp ýeňmegi bilen tamamlandy. Jons karýerasynda üçünji gezek UFC-niň çempiony adyna eýe boldy, owal ol iki gezek agyr agramda guşaga eýe bolupdy. Ol 2011-nji ýylyň mart aýynda braziliýaly türgen Maurisio Ruany ýeňip, guramanyň taryhynda iň ýaş (23 ýaş) çempion bolmak bilen, ilkinji gezek UFC-niň çempionlygyny gazanypdy.
Soňra Jons titulyny sekiz gezek üstünlikli gorady we 2015-nji ýylyň aprelinde bolsa UFC-niň türgenleriniň özüni alyp baryş kadalaryny bozandygy sebäpli çempionlyk adyndan mahrum edildi. Bir ýyldan soň Jons UFC-niň wagtlaýyn çempionlyk ady ugrundaky göreşde ýeňiş gazandy, ýöne doping üçin geçirilen synagyň položitel çykmagy sebäpli ýene guşakdan mahrum edildi. Amerikaly türgen watandaşy Entoni Smiti ýeňip, 2018-nji ýylyň dekabrynda çempion diýen ady yzyna gaýtaryp aldy. Şondan bäri Jons çempion adyny üç gezek üstünlikli gorady. 2020-nji ýylyň fewral aýyndan bäri ol UFC-niň ýaryşyna gatnaşmady.
35 ýaşly Jonsuň hasabynda garyşyk söweş sungatynda (MMA) 27 ýeňiş we 1 ýeňliş bar.
